16 September 2019

RSS Facebook

سوداگریز


تازه خبرونه

تبصره

تبصره

کابل باختر دوږي ٢٤مه : پاکستان دډار اچوونکو ډلو او دافراطي...

حسينه ساپۍ : افغان ښځه  په بېلابېلو برخو کې درهبرى  او پروګرام جوړونې او دهغو دعملي کولو توان لري .

حسينه ساپۍ : افغان ښځه په بېلابېلو برخو کې درهبرى او پروګرام جوړونې او دهغو دعملي کولو توان لري .

کابل باختر دوږي ٢٤مه : داطلاعاتواوفرهنګ وزارت دسرپرستې حسينې ساپۍ په...

 دخواجه ملک سبز علي  تاريخي څلى بيا رغول کېږي .

دخواجه ملک سبز علي تاريخي څلى بيا رغول کېږي .

کابل باختر دوږي ٢٤مه : داطلاعاتواوفرهنګ وزارت دفرهنګ او هنر معين...

Youtube Player

khantry design

سوداگریز

سوداگریز

Sunday, 15 September 2019 03:43

تبصره

کابل باختر دوږي ٢٤مه :
پاکستان دډار اچوونکو ډلو او دافراطي  جريانونو په ملاتړ په افغانستان کې يو ژور ستراتيژيکي  پروګرام تعقيبوي ، ددې پروګرام پايله  به يو کمزورى  اوزيانمنونکى افغانستان  وي چې پاکستان به په اسانى سره  په هغه لاسرسي ولري .
دباختراژانس مفسر ليکي: دهېواد دملي امنيت لوى رياست دتېرې پنجشنبې  په ورځ په کابل کې  دداعش دخطرناکې تروريستي ډلې دغړو دنيولو خبرورکړ چې لږ ترلږه   په  ٢٩ ډار اچوونکو پېښو کې چې دافغانانو لپاره خونړۍ  او دردونکي  وې لاس درلود
دغه راز دامنيتي ځواکونو مسوولانو دننګرهار  په خوږياڼيو کې دداعش دمطبوعاتي مسوول حسن پنجابي  دوژل کېدو خبر هم ورکړ .
دکابل ښار داوولسمې ناحيې په ساحه کې  دداعش دډلې په مرکز دامنيتي ځواکونو په عملياتو کې دپاکستان دوه اتباع وژل شوي دي .  اويوه پاکستانۍ ميرمن له خپلو  څلورو ماشومانوسره چې دغه کوريې  ديوې کورنۍ داستوګنې په نامه ترپوښښ لاندې نيولى و ،  ټپۍ شوې ده چې ترعلاج اودرملنې لاندې ده .
هغه تروريستي  شبکه چې دتېرې پنجشنبې په ورځ په کابل کې ونيول شوه لږ ترلږه  دکابل په  ٢٩ ډار اچوونکو پېښو کې لاس لري .
دروشنايي  غورځنګ  په غړو بريد ،  دقمبر په څلور لارې کې داردو په مرکز بريد ، دکابل شش درک ته دځانمرګي کسانو لېږدونه ، په خبريالانو بريد ، په پل محمود خان کې ځانمرګي بريد ، دمارشال محمدقسيم فهيم دپوځي اکاډمۍ په محصلانو بريد، دسيلو په واټ کې دمحصلانو دسپرلۍ  په موټر  بريد ، دبرکي  په څلور لارې  کې د حج اواوقافو وزارت دمامورانودسپرلۍ   په موټر بريد ،  معترضونو نوماندانو په خيمې بريد ، دبهرنيوچارو وزارت  په ديپلوماتانو بريد ،دکابل ښار په يوولسمه ناحيه کې  دامام زمان په جومات بريد ، دانتخاباتو کمېسيون ته څېرمه دوکيلانو په مظاهرو  بريد و ددين له عالمانو څخه په مفتي نعمان دماين اېښودل ، په کابل کې دنيپال داتباعودسپرلۍ  په موټر بريد ، دسخي کارتې په زيارت کې دعاشورا په ماتم لرونکو دبريد لپاره دځانمرګو بريدګرو دعاملانو لېږدونه او په کابل کې دعراق په سفارت بريد دهمدې شبکې کار دى .
دغه بريدونه  دافغانستان دخلکو لپاره  خونړي اودردونکي دي .
هغه څه چې  دافغانستان دخلکو لپاره  له اندېښنو ډک دي ددغه شان ناخوالو په څرګندولو کې  دپاکستان  داتباعو ونده او رول  دى .
  پاکستان چې له ډار اچونې سره  دمبارزې  لوړ ادعا  کوي او له دغې پديدې سره  دمبارزې  له پلوه يې  له نړيوالې ټولنې څخه زيات باج  اخستې دى  په افغانستان کې د ډار اچوونکو ډلو ترمنځ خپلواتباعو شتون  چې دزياترو تروريستي بريدونو طراحان دي  ، څه ډول  توجيه  کوي  ؟
په افغانستان کې په ډار اچوونکو پېښو کې دپاکستان  داتباعو رول څه دطراح په توګه  ، دجګړې  دمديريت کوونکي او  جګړه مار په توګه  يواځې  دهغې شبکې  په شتون کې  چې دپنجشنبې په ورځ په کابل کې  ونيول شوه  ،  نه خلاصه کېږي .
  همدااوس دپاکستان برحال  جنرال په شيخ مطيع الله مشهور جنرال ارشاد حسين چې دطالبانو دمتفکر مغز  لقب يې  اخستى دى  په جوزجان اوفارياب کې  دايمي شتون لري  اودافغانستان په شمال کې دطالبانو دجګړې  مديريت کوي .
دداعش دهغوڅلورو  مشرانو له جملې څخه چې تراوسه پورې په افغانستان کې وژل شوي دي، درې تنه يې دپاکستان اتباع و . ددې ترڅنګ دسرپل ،  جوزجان ، بدخشان ، فارياب ، هلمند ، روزګان ، ننګرهار او دکونړ اوسيدونکي  په خپلو ولايتونوکې  دپاکستاني طالبانو دشتون په باره کې  زياتې خبرې لري .چې دطالبانو  اويا دداعش په شان دنورو  ډار اچوونکو ډلو  ترڅنګ  دافغانستان دخلکو په وړاندې په جګړه کې دي .
  دختيځو ولايتونو  اوسيدونکي دډيورنډ دکرښې  په دواړو لورو کې دوسله والو ډلو  دمنظم تګ راتګ  شاهدان دي . دشينوارو خلکو په وار وار  ويلي دي چې پاکستاني  مليشې  په منظم ډول  داعشيان  چې له طالبانوسره  جلا شوې ډله ده  په منظم ډول مرسته  کوي . اوسمبالوي يې .
دروسيې  استخباراتي سرچينو په واروار  دامسئله  رسنيزه کړې ده  چې داعش  افغانستان ته  دکډې  کولو  په حال کې دى . او له عراق او سوريې  څخه ددغې ډلې  ماتې خوړلې کسان دعربي متحده اماراتو ،  عمان ، اودکراچي بندر له تګلوري څخه پاکستان او وروسته افغانستان ته  رالېږدول کېږي .
داعش چې تر دوه درې کلونو مخکې پورې  دافغانستان دخلکو لپاره  پېژندل شوى  نوم و ،  خو له طالبانو سره  دسولې  دپروګرام په پيلولو سره دغې ډلې په افغانستان کې  سر پيداکړ ، داښيي  چې داعش په افغانستان کې يوه بله  استخباراتي پروژه ده  چې له طالبانوسره  له سولې وروسته به په افغانستان کې زيات ماموريتونه  ولري .
اوس  په افغانستان کې دداعش خطر له بل هر وخت څخه زيات  جدي دى .  چې له بده مرغه  يو شمېر بهرني هېوادونه  دپاکستان په محور کې ددغې ناوړې پروژې په رامنځته کولو کې  شريک دي .اودجنايت  مرتکب کېږي .
دلږ ترلږه ٢٩ ډاراچوونکو خونړيو فعاليتونو ترسره کول  هغه هم  په کابل کې  دداعش  ديوې شبکې له لوري ددقت او مکس وړ خبره ده چې نه شو کولى په افغانستان کې  دداعش په فعاليت  سترګې پټې کړو او له هغه څخه په اساني سره تېر شو .
دداعش  خطر  دافغانستان له پولو څخه وړاندې دى . او دغه ډله دسترو سيمه ييزو او له سيمې څخه بهر ماموريتونو دترسره کولو لپاره  رامنځته شوې ده چې له بده مرغه  پاکستان  افغانستان ته   دهغې په راکښلو کې محوري رول لري .
دافغانستان دولت بايد هغه زيانمنې چې دپاکستان له ناحيې څخه دافغانستان  خلکو او دولت او سيمې ته متوجه دي رسنيزې کړي . او په سيمه ييزو  او له سيمې څخه بهر هلوځلو سره پاکستان  له خپلولوړتيا غوښتونکو غوښتنو څخه تېر کړي اوددې ترڅنګ  پاکستان بايد  متوجه شي چې دخپلو اتباعو په وړاندې  مسووليت منوونکى  واوسي .
  ختم_ ف _ اکرم

کابل باختر دوږي ٢٤مه :
داطلاعاتواوفرهنګ وزارت دسرپرستې حسينې ساپۍ په وينا سره ( په وروستيو  ١٠٠ کلونوکې دافغان ښځو  دفرهنګي حالت  دتحليل  ) سيمينار نن په کابل کې جوړ شو .
دباختراژانس دخبريال دخبرله مخې ،  دغه سېمينار داطلاعاتواوفرهنګ وزارت  دمعينانو او رييسانو ،  دښځو دبېلابېلو بنسټونو دمسوولانو او استازو  ،  علمي  اوفرهنګي شخصيتونو او دکورنيو اوبهرنيو ميلمنو په ګډون جوړ شو .
  دسېمينار  دپرانستلو په غونډه کې داطلاعاتواوفرهنګ وزارت سرپرستې حسينې ساپۍ وويل : چې ددې سېمينار دجوړولو موخه  په وروستيو ١٠٠ کلونوکې  دافغانستان دښځو دفرهنګي حالت څېړنه ده.  چې په ١٠ برخوکې  تر تحليل لاندې  نيول شوي دي  :  ښکلي  هنرونه ،  تياتر ، موسيقي ، ژورناليزم ،  فلم ، ژبې او ادبيات ، ورزش ، ګرځندوى ، ټولنيز فعاليتونه او کسبګري .
داطلاعاتو اوفرهنګ وزارت سرپرستې زياته کړه: په وروستيو ١٠٠ کلونوکې  هغه  نيمګړتياوې ، نواقص او خنډونه  چې  په بېلابېلو برخو په تېره بيا په فرهنګي برخو کې  دښځو دفعاليتونودلارې پرسر پراته و ، ددغو نيمګړتياو او خنډونو دلرې کولو په خاطر  به  په راتلوونکو پروګرامونوکې  هڅه وشي .
دغه راز  حسينې ساپۍ  دهغو فرهنګي  پروګرامونو په اړوند چې  په بېلابېلو برخو کې  دهېواد دخپلواکۍ  دترلاسه کولو د١٠٠ کاليزې په مناسبت  دروان کال  له پيل څخه  ترسره شوي دي ، معلومات ورکړل او ويې ويل :  د اطلاعاتو اوفرهنګ  وزارت دنده ده چې  دهېواد دخلکو دفرهنګ او دودونو دساتنې او ودې  په لاره کې چې  په حقيقت کې دهېواد دهويت  څرګندوي دي ، زيات کار او هڅه  وکړي .
  هغې زياته کړه چې افغان ښځه  په بېلابېلو برخو کې  درهبرى او پروګرام جوړولو او دهغو دعملي کولو توان لري .
  وروسته  ددې سېمينار په اړوند دهېواد دلومړى ميرمنې ويديويي پيغام خپور شو، په هغه کې  لومړى ميرمنې  ويلي دي  چې دافغانستان ښځو دتاريخ په اوږدو کې او په تېره بيا په وروستيو ١٠٠ کلونوکې  په بېلابېلو برخو کې په تېره بيا په فرهنګي برخه کې  يولړ فعاليتونه  ترسره کړي دي  اولاسته راوړنې  لري چې دستاينې وړ دي .
په پيغام کې څرګنده شوې ده  چې  ښځو په تېرو جګړو کې  زيات کړاونه ګاللي دي او خپل  عزيزان يې  له لاسه ورکړي دي  او  ددايمي سولې  تامينول دهغوى  له مهمو اړتياو څخه دي .
  لومړى ميرمنې ټينګارکړى دى چې ښځې دسولې پيغام راوړونکي دي اودجګړې او تاوتريخوالي فرهنګ  پاى ته رسوي  او دسولې ، ديوبل مننې  ، پيوستون او هېوادپالنې  غوښتونکي دي .
دغه راز  ددې سېمينار  لومړى برخې  دزهرې يوسف  په چلوونې  په کار پيل وکړ او په دې برخه کې  دکابل پوهنتون استادې  پوهنملې  صفيې رحيم  په افغانستان کې  دورځپاڼه ليکنې  په فعاليتونوکې په وروستيو ١٠٠ کلونوکې  دښځو درول ،  فضيلې رحيم  په وروستيو ١٠٠ کلونوکې دموسيقي، هنر او په دې برخه کې دښځو دفعاليت ،  دکابل پوهنتون استادې  لطيفې  مهران  دتجسمي هنرونو او په دې برخه کې دښځو درول په اړوند ، ديانا محسني  په وروستيو ١٠٠ کلونوکې  دتياتر او په دې برخه کې  په ١٠٠کلونوکې دښځو درول په باب او دغه راز  صحرا کريمي  په هېواد کې دفلم او سينما دحالت  او په دې برخه کې دښځو درول  په باب  په ترتيب سره معلومات ورکړل اوددغو برخودښه والي په خاطر يې  خپل وړانديزونه  طرحه کړل .
  ددې سېمينار  دويمې برخې  د ماري اکرمي  په چلونې  په کار پيل وکړ  او په دې برخه کې  شهلا  فريد په تېرو ١٠٠ کلونوکې دښځو  دټولنيزو فعاليتونو ،  بلقيس عمر  په تېرو ١٠٠ کلونوکې دګرځندوى دحالت په اړوند ، حميرا بارکزى په وروستيو ١٠٠ کلونوکې دورزش دبرخې په اړوند ، فرشتې همتي  دصنعت او سوداګرى   دلرغونتيا او په دې برخه کې د ښځو درول  او  نعيمې  غني په تېرو ١٠٠ کلونوکې  دادبياتو دحالت او په دې برخه کې دښځو درول په اړوند  په ترتيب سره څرګندونې وکړې  او ددغوبرخو دښه والي او ملاتړ په خاطر يې خپل  مشخص  وړانديزونه وړاندې کړل .
دغه راز  ددې غوڼډې په  بهير کې داطلاعاتواوفرهنګ وزارت سرپرستې او يوشمېر مسوولانو د( پيشتازان فرهنګ  کتاب  پرانست  چې  دغه کتاب  داطلاعاتو اوفرهنګ وزارت  له لوري  چاپ شوى دى  او په هغه کې دهېواد  له  ٣٤ ولايتونو څخه  په بېلابېلو فرهنګي برخو کې  مخکښې ښځې  ورپېژندلې شوي دي .  )
  داطلاعاتواوفرهنګ وزارت سرپرستې  له هغو همکارانو  څخه چې ددې کتاب دمعلوماتو په راټولولو کې  هڅه کړې ده  په تېره بيا  داطلاعاتواوفرهنګ وزارت له ولايتونو  سره  داړيکو آمر  وحيد الله معنى  څخه  مننه وکړه .
  وروسته  هغه تياتري  نمايشنامه چې په تېرو ١٠٠ کلونوکې يې  دفرهنګي فعاليتونو  ځينې برخې تصوير شوې وې  دملي تياتر دممثلانو په واسطه  اجرا شو .  په همدې ترتيب  ددې سېمينار ١٧فقره ييز پريکړه ليک  دمحبوبې بابکرخيل اودسيما رسولي  په واسطه  ولوستل شو چې په يوه برخه کې يې ويل شوي دي .
دتاريخ په اوږدو کې دښځو دکارنامو دښې پېژندنې په خاطر بايد دنومياليو ښځو تذکرې  راټولې او چاپ شي .  دواټونو او څلور لارو په نومولو اودغه راز مډالونوکې دهېواد دنومياليو ښځو نومونه په پام  کې ونيول  شي . کال په کال دې  له هغو ښځو  څخه  چې دفرهنګ په برخو کې فعاليت کوي ، بايد يوه ښځه  مشخصه شي  او تر هڅونې لاندې ونيول شي .  داطلاعاتواوفرهنګ وزارت دې  دهنرمندو ښځو لپاره  دملاتړ يوصندوق جوړ کړي .
دغه راز په پريکړه ليک کې له دولت څخه غوښتل شوي دي  چې په بېلابېلو برخو کې دې  دښځو په وده او پرمختيا کې  ملاتړ وکړي . او دښځو لپاره دې دفعاليت   ښې زمينې  برابرې کړي .
دسېميناردکار په پاى کې  حسينې ساپۍ  دښځو دلاسي  او هنري صنايعو نندارتون پرانست  او برخه والو هغه وکوت .
ختم_ ف _ اکرم
                                                              

کابل باختر دوږي ٢٤مه :
داطلاعاتواوفرهنګ وزارت دفرهنګ او هنر معين پوهاند محمد رسول باوري دلوګر په محمد اغې ولسوالۍ  کې ديوه موزيم دجوړولو کار پرانست .
دغه موزيم ټاکل شوې ده په دېرش جريبه ځمکه کې جوړ شي او دهغه دانګړ دجوړولو کار نن پيل شو .
دباختراژانس دسيمه ييز خبريال له مخې ، پوهاند باوري ددغه موزيم دانګړ دديوال دډبرې داېښودلوپه وخت کې وويل: دهغې ځمکې لپاره چې دموزيم دجوړولوپه مقصد په پام کې نيول شوې ده داطلاعاتواوفرهنګ وزارت له پرمختيايي بودجې څخه څه دپاسه  ٨ ميليونه افغانۍ لګېږي .
پوهاند باوري څرګنده کړه چې ددغه ځاى له انګړ وروسته دموزيم لپاره معياري انګړونه جوړېږي چې په هغو کې دبودايانو د دورې استوپې  او معبدونه چې دکېندنو په پايله کې دعينکو دمسو له لرغونوساحو څخه ترلاسه شوي دي ، کېښودل شي .
پوهاند باوري  دغه راز يادونه وکړه چې داطلاعاتواوفرهنګ وزارت هڅه کوي چې ډير ژر دلوګر په مرکز پل علم کې په څه دپاسه ٣ جريبه حمکه کې  ديوه مويم ودانۍ جوړه کړي .
په دغو مراسمو کې دلوګر والي ، امنيتي مسوولانو د پارلمان او دلوګر دولايتي شورا يوشمېر غړو او داطلاعاتواوفرهنګ وزارت دلرغون پېژندنې  رييس شتون درلود .
دلوګر  داطلاعاتواوفرهنګ رييس عبدالرحمن تسل وايي چې اوس ددغه ولايت داطلاعاتواوفرهنګ په رياست کې په  ابتدايي ډول يومويم شته چې په هغې کې لرغونې لوښې  اولاسي صنايع اېښودل شوي دي
هغه زياته کړه چې دعينکو په مسو کې کافرکوټ ، خروار او سجاوند کې لرغونې ساحې شتون لري  خو لاتراوسه پورې دلوګر معياري موزيم  جوړ شوى نه دى څه دپاسه ١٠ کاله کېږي  چې دعينکو دمسو په لرغونې ساحه کې قانوني کېندنې دوام لري او په سلګونو منقول ترلاسه شوي آثار ، په لوګر کې دموزيم دنه شتون په نسبت دکابل ملي موزيم ته لېږدول شوي دي .
  ختم_ عطاالله _ اکرم

                                   

کابل باختر دوږي ٢٤مه :
دفراه دانار درې لپاره دطالبانو داستخباراتو مسوول تېره شپه دپوځيانو په ځانګړو عملياتو کې ووژل شو .
دفراه دامنيې قوماندانۍ وياند محب الله محب دباختراژانس خبريال ته وويل چې، دانار درې په ولسوالۍ کې دطالبانو داستخباراتو مسوول په انس مشهور  مولوي عصمت الله په دغه ولايت کې دپوځيانو په ځانګړو عملياتو کې ووژل شو
  ختم_ عطاالله _ اکرم

کابل باختر دوږي ٢٤مه :
په قندهار کې  دوه واټونه له جوړولو او پخولو وروسته ګټې اخستنې ته وسپارل شول .
  دغه واټونه  د١٥٠٠مترو په اوږدوالي اود١٠ مترو په سور دقندهار ښار په مرکز کې موقعيت لري .
ددغو واټونو په جوړولو اوپخولو سره دقندهار دزرګونو اوسيدونکو په تګ راتګ کې اسانتيابرابره شوه .
دقندهار والي حيات الله حيات ددغو واټونو دپرانستلو په مراسمو کې وويل: دى هڅه کوي چې دمرستندويو بنسټونو په مرسته  دقندهار په بېلابېلو  سيمو کې په لسګونو  ويجاړ او خامه واټونه جوړ اوپاخه کړي .
ددغو واټونو په جوړولو او پخولو کې څه دپاسه ١٠ ميليونه او اووه سوه زره افغانۍ  لګيدلي دي  چې دکليو دبيا رغاونې او پرمختيا وزارت دولسي تړون دپروګرام له لوري ورکړى شوي دي .
  ختم_ ف _ اکرم

 

کابل باختر دوږي ٢٤مه :
طالبانو په بغلان کې دازبکستان او تاجکستان دوارداتي  برېښنا ستنې ويجاړې کړې .
يرغلګرو پرون غرمه او نن سهار دبغلان په مربوطاتو کې دوارداتي برېښنا دوه ستنې په بمونوسره ويجاړې کړې .
دبرېښنا ددغو دوو ستنو په ويجاړيدو سره کابل او لسو نورو ولايتونو ته دتاجکستان دوارداتي  برېښنا بهير بند شو .
دبغلان دبرېښنا رياست يوې سرچينې باختراژانس ته وويل چې له دغو دوو  ويجاړو شويو ستنو څخه يوه دطالبانو دډلې تر ادارې لاندې ساحه کې موقعيت لري او اړونده کارکوونکي د هغې دترميمولو لپاره له ستونزو سره مخامخ دي .
دبرېښنا شرکت هم دخبرپاڼې په خپرولو سره افغانستان ته دازبکستان او تاجکستان دوارداتي برېښنا دستنو نړيدل مني خو وايي چې ددغو ستنو دترميمولو لپاره کار دوام لري .
خبرپاڼه  له طالبانو سره دپوځيانو په نښته کې ددغو دوو ستنو دويجاړيدو اصلي عامل بولي
دپېښې شاهدان  وايي چې طالبانو پرون غرمه دبغلان د ډنډ شهاب الدين په ساحه کې افغانستان ته د ازبکستان دوارداتي برېښنا يوه ستن  دبم په چولو سره ويجاړه کړه.
دغه راز طالبانو نن سهار دبغلان عسقلان  په ساحه کې دتاجکستان دوارداتي برېښنا يوه ستن ويجاړه کړه .
  ختم_ عطاالله _اکرم

 

کابل باختر دوږي ٢٤مه :
دلوګر دمحمداغې په ولسوالۍ کې دمحمد سليم لعل ښوونځي دودانۍ د جوړولو کار  بشپړ اودغه ودانۍ پرون پرانستل شوه
دلوګر دپوهنې رياست وياند شاهپور عرب باختراژانس ته وويل: دغه ودانۍ چې اته  درسي او څلور اداري خونې ،لابراتوار او کتابتون لري دپوهنې وزارت له غير مشروطي  بودجې  څخه د څه دپاسه ١٤ ميليونو افغانيو په لګښت په دوو کلونوکې جوړه شوې ده .
عرب زياته  کړه چې دغه ودانۍ په ميزونو ،څوکيو او کمپيوترونو سمبال دى او په هغه کې ٣٤٣ تنه زده کړه کوي .
  ختم_ ف – اکرم

کابل باختر دوږي ٢٤مه :
دعدالت غوښتنې کنفرانس او دشهيد ډاکتر نوروز شينوارى  دفاتحې اخستلو مراسم  نن په کابل کې  پرځاى شول .
دفاتحې اخستلو مراسم اودعدالت غوښتنې کنفرانس دافغانستان د طبي ټولنو فدراسيون له لوري  جوړ شو .
دباختراژانس دخبريال دخبرله مخې،  په دې کنفرانس کې برخه والو  دروغتيايي کارکوونکو په خونديتوب باندې ټينګار وکړ او دحکومت له مشرتابه  څخه يې وغوښتل چې دروغتيايي کارکوونکو دوژنې دعاملانو په تېره بيا دشهيد ډاکتر نوروز شينواري  دوژنې  دعاملانوپه نيونه او محاکمه کې غوڅ اقدام وکړي اودهېواد دطبي کارکوونکو امنيتي ستونزې ته دې  کلکه پاملرنه  وکړي .
ډاکتر نوروز شينواري تېره اوونۍ په جلال اباد ښار کې په يوه ډار اچوونکي پېښه کې شهيد کړى شو .
ددغو مراسمو په پيل کې  دافغانستان دطبي ټولنو دفدراسيون رييس ډاکتر نجيب الله امر خيل  خبرې وکړې او ويې ويل  چې طبي منسوبين  په يوازيتوب سره کوم کار نه شي ترسره کولى ، بايد دخصوصي  او دولتي برخې  ټول روغتيايي کارکوونکي  له يوبل سره  يو موټي شي او په  متحد ډول دې  له حکومت  څخه وغواړي چې په هېواد کې  دطب  دکارکوونکو  دځنځيره يي وژنو په باب  عملي او قانع کوونکي اقدامات ترلاس لاندې ونيسي .
هغه دډاکتر نوروز شينواري شهادت ته  په اشارې سره وويل چې، هغه  نه يوازې په هېواد کې  داورتوپيدي  دبرخې تکړه کدر و ، بلکې په سيمه کې ددغه ارواښاد له ځواکمنيو څخه برابر ډاکتر شتون نه لري .
هغه دهېواد ددغه تکړه پروفيسر وژنه دسيمې په استخباراتي کړيو پورې  اړونده وبلله .
په همدې ترتيب په ولسي جرګه کې دپکتيا دخلکو استازي ډاکتر يار باز چې ځان يې  دشهيد پروفيسر شينواري  يوشاګرد وباله  وويل  چې، ديو ډاکتر په توګه هڅه کوي  چې دهېواد دطب دکارکوونکو  اندېښنې  دملت په کور کې  طرحه کړي .
په همدې ترتيب  داورتوپيدي دبرخې  دډاکترانو استازي  ډاکتر ايمل وردګ ، دننګرهار پوهنتون پخوانى رييس ډاکتر خالد يار ،. ډاکتر ايوب شينواري ، ډاکتر فياض ساپي ،  دخصوصي روغتونونو دټولنې رييس  ډاکتر فردين ،  داسلامي ډاکترانو  داتحاديې رييس  ډاکتر صميم  خالد ،  دعامې روغتيا دوزير سلاکار  ډاکتر احمدجان نعيم ، او دطبي عالي شورا غړي ، ډاکتر احمد شاه شکوهمند ، د ډاکتر شينواري دشخصيت  ، اهليت او مسلکي ځواکمني  په اړوند خبرې وکړې او ويې ويل  چې په هېواد کې به د اورتوپيدي دبرخې ددغه پروفيسر  لوړ مقام دتل لپاره  تش وي .
په دغو مراسموکې  دشهيد نورو ز شينواري ورور استاد زمرک شينواري  خبرې وکړې او دشهيد  له کورنۍ سره دهېواد دطبابت دکورني دهمدردۍ له امله مننه وکړه  او له حکومت او دننګرهار ولايت له مشرتابه څخه يې وغوښتل چې ددغه جنايت دعاملانو په نيونه  کې اقدام وکړي .
په پاى کې  دبرخه والو درې فقره ييز  پريکړه ليک ولوستل شو . او متن يې دجمهور رييس سلاکار  ، داجراييه رييس سلاکار اودافغانستان دطبي عالي شورا استازي ته وسپارل شو .
برخه والو په پريکړه ليک کې ټينګار کړى دى که چېرې ددوى غوښتنو ته  پاملرنه ونه شي  په هېواد کې به په سراسري اعتصاب لاس پورې کړي .
ختم_ ف _+ اکرم

 

ښرنه/باختر/ د وږي ۲۴ مه
د پکتیکا د امنیې قوماندانۍ مسوولین وايي چې د دغه ولایت په وړممۍ ولسوالۍ کې ۹۰ وسله وال طالبان وژل شوي او ۴ نور یې نیول شوي دي.
د دغه ولایت امنیه قوماندان سمونوال ایمل نیازي نن په جوړ شوي مطبوعاتي کنفرانس کې رسنیو ته وویل چې په وړممۍ ولسوالۍ کې د افغان ځواکونو او طالبانو ترمنځ له تېرو څو ورځو را په دې خوا جګړې روانې وې چې پکې د هوایي او ځمکنیو عملیاتو پر مهال ۹۰ وسله وال طالبان وژل شوي دي.
نیازي زیاته کړه: د دغه ولایت په سروضې ولسوالۍ کې هم څلور طالبان هغه مهال نیول شوي چې غوښتل یې د سړکونو په غاړو او نورو عمومي ځایونو کې ماینونه ځای پر ځای کړي او عامو خلکو ته زیان ورسوي.
هغه وویل چې دغه راز په عملیاتو کې یې د وسله والو څو وسلې او مهمات هم له منځه وړي دي.
بل لورته نیول شوي طالبان هم په خپل جرم اعتراف کوي او زیاتوي چې دوی غولول شوي دي.
ویل کېږي په عملیاتو کې افغان ځواکونو ته د سر زیان نه دی اوښتی.
پای/وصال


 

کابل/باختر/ د وږي ۲۴ مه
د پکتیا د اطلاعاتو او فرهنګ ریاست مسوولین وايي چې نن یې د دغه ولایت په مرکز او ولسوالیوکې د کتاب ټولولو درې ورځنی  کمپاین پیل کړ.
دوی وايي چې یاد کمپیاین یې د عامه کتابتونونو د غني  کولو او د کتاب مطالعې ته د ځوانانو د هڅولو په موخه پیل کړی دی.
د پکتيا د اطلاعاتو او فرهنګ رييس صلاح الدين سليس باختر آژانس ته وويل: د کتاب له راټولولو مو موخه دا ده چې خپل عامه کتابتونونه بډاى او ځوانان کتاب لوستلو ته وهڅوي.
په همدې حال کې د پکتیا د والي مرستیال عبدالولي سهي د کتاب ټولولو په موخه پیل شوی کمپاین وستایه او څو ټوکه کتابونه یې هم مرسته وکړه.
د پکتيا پوهنتون محصل عزت الله سادات هم یاد کمپاین اغېزمن وباله او زیاته کړه چې د دغه کمپاین پر مټ به زده کوونکي مطالعې ته وهڅول شي.
د پکتيا پوهنتون استاد سید رحمت الله خليلي باختر آژانس ته وويل: په ځوانانو کې د کتاب لوستلو دود ډېر کمزورى دی، هيله مو دا ده چې دا دود پياوړی او د ولايت په هره سيمه کې پيل شي او په پراخه کچه ځوانان پکې برخه واخلي.
په ورستيوکې په پراخه کچه کتابونه د چاپ په ګاڼه سمبالېږي، خو لوستوونکي يې د ګوتو په شمېر دي، په پکتيا کې د يوه  خصوصي کتابتون څښتن وايي: پخوا چې کتابونه کم چاپېده، خو لوستوونکي يې زيات وو، اوس چې کتابونه زيات چاپېږي، د لوستوونکو  شمېر يې کم شوی دی.
ځيني کسان بیا په دې آند دي چې کمپیوټر، انټرنټ او ټلېفون هغه څه دي چې د کتاب لوستلو دود یې تت کړی دی. دوی وايي چې په اوس وخت کې زیات خلک له انټرنټ څخه ګټه اخلي او د خپلې خوښې وړ مواد په کم وخت او لږ قیمت سره له نړیوال جال څخه ترلاسه کوي، نو له همدې امله د کتاب لوستوونکي کم شوي دي.
پای/وصال

 

Page 1 of 8052