18 March 2019

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل/ باختر/ د کب د مياشتې ٢٧مه
د نیمروز ولایت په خاشرود ولسوالۍ کې د سیلاو ځپلو کورنیو لپاره د مرستې د راټولولو کمپاین پیل شو.
د نیمروز د مدني بنسټونو د شبکې مسوول عتیق الله نورزاد د باختر آژانس سیمه ییز خبریال ته وویل چې مدني بنسټونه او د طبيعي پېښو پر ضد ریاست د نیمروز د ولایتي شورا په همکارۍ، د خاشرود ولسوالۍ د اوسیدونکو د ملاټر او همدردۍ په موخه چې د وروستیو سیلاوونو له امله زیانمن شوي دي، درې ورځنی کمپاین په لاره اچولی دی.
ده وویل چې دوی هیله لري په دغه کمپاین کې د زیانمنو شویو کسانو لپاره یوه اندازه پیسې را ټولې کړي.
ختم/ ع

کابل/ باختر/ د کب د مياشتې ٢٧مه
د افغانستان د اسلامي جمهوریت جمهوررئیس محمداشرف غني عربي متحده اماراتو ته د خپل سفر په دوهمه ورځ نن سهار په افغانستان کې د عربي متحده اماراتو د مخکېني سفیر شهید جمعه محمد عبدالله یلیل الکعبي کورنۍ سره وکتل او یو ځل بیا یې هغوی ته د تسلیت ترڅنګ د شهید یلیل الکعبي د ارزښتناکو خدمتونو په درناوي د هغه کورنۍ ته د علامه سید جمال الدین افغان دولتي نښان ورکړ.
د جمهور رییس د ویاند دفتر باختر آژانس ته خبر ورکړ:
په دې اړه لوستل شوي فرمان کې راغلي:  شهید جمعه محمد عبدالله یلیل الکعبي په افغانستان کې د خپل ماموریت پر مهال د هر اړخیزو اړیکو د پراختیا، د ثبات د تحکیم او د همکاریو په جلبولو کې زیاتې هڅې وکړې او د دندې په ترسره کولو کې یې خپله شایستګي وښوده.
جمهوررئیس غني د یاد نښان له ورکولو وروسته د شهید جمعه محمد عبدالله یلیل الکعبي د ټولنیزو او خیریه فعالیتونو ستاینه وکړه او وې ویل، افغانستان او عربي متحده امارات پخوانۍ او د ورورولۍ اړیکې لري او د خلکو دښمنان په چادونو او ځانمرګو بریدونو دغه اړیکې نشي زیانمنولی.
وروسته  د عربي متحده اماراتو د شهیدانو چارو رئیس شېخ خلیفه بن تحنون بن محمد آل نهیان وویل، د افغانستان او عربي متحده اماراتو اړیکې دوستانه او د ورورولۍ دي او د شهید جمعه محمد عبدالله یلیل الکعبي قربانۍ دا وښوده چې په هر ډول شرایطو کې موږ د یو بل ترڅنګ یوو.#
پای – ذ

کابل/ باختر/ دکب دمياشتې ٢٧مه
د اطلاعاتو او فرهنګ وزارت د ځوانانو چارو معينيت د پوهنې وزارت د ليک لوست د زده کړې له معينيت سره هوکړه ليک لاسليک کړ.
د باختر آژانس د خبرله مخې:
د دغه هوکړه ليک له مخې به په ټول هېواد کې زرګونو تنو بې سوادو ځوانانو او د زيات عمرلرونکو کسانوته د ليک لوست د زده کړې زمينه برابره شي.  
دغه کورسونه د هېواد په ٣٤ ولايتونو کې د پنځو کلونو لپاره جوړیږي چې د ځوانانو چارو د معينيت له خوا برابر او رضاکار ښوونکي به وګومارل شي او د پوهنې وزارت د سواد د زده کړې معينيت له خوا به دغو کورسونو ته کتابونه، قرطاسيه او نور ضروري توکي برابر شي.
د دغه هوکړه ليک له مخې به د دغو کورسونو فارغانو ته په ښوونځيو کې د زده کړې زمينه برابره شي .
د اطلاعاتو او فرهنګ وزارت د ځوانانو چارو معين ډاکتر کمال سادات د پوهنې وزارت د سواد د زده کړې له معينيت څخه چې د هېواد په بېلابېلو سيموکې يې خلکو ته د سواد د زده کړې زمينه برابره کړې ده، مننه وکړه.
وروسته د پوهنې وزارت د سواد د زده کړې معين ډاکتر سردارمحمد رحيمي په خپلو خبرو کې د ځوانانو چارو د معينيت هلې ځلې چې د هېواد ځوانانو ته يې کړې دي؛ وستايلې.
پاى \ ج\  ذ

کابل/ باختر/ دکب دمياشتې ٢٧مه
په لوګر ولايت کې د وسله والو طالبانو د پوځي کمېټې مسوول تېره شپه له درېیو تنو افرادو سره يې ونيول شو.
د ځانګړوعملياتو د قول اردو مطبوعاتي مسوول ډګرمن قيوم نورستاني باختر آژانس ته وويل چې د وسله والو طالبانو د پوځي کمېټې مسوول په ستانکزي مشهورنجيب الله له خپلو درېيو تنو افرادو سره یې د لوګر ولايت د بره کي برک ولسوالۍ د ازبک خېلو په کلي کې د کومانډو ځواکونو په عملياتوکې ونيول شو.
ده زياته کړه چې په دغو عملياتوکې د دښمن يو کلاشنيکوف، دوه تومانچې او دوه فولډر موټرونه ترلاسه شوي دي او د دغې ولسوالۍ د ازبک خېلو کلى د وسله والو طالبانو له شتون څخه پاک شوى دى.
د يو بل خبرله مخې:
په لوګر ولايت کې پرون دوه تنه وسله وال طالبان ووژل شول.
د لوګر ولايت د امنيې قوماندانۍ وياند شاهپور احمدزي وويل چې دغه وسله وال طالبان چې په موټرسايکل سپاره وو، د لوګر ولايت د محمدآغې ولسوالۍ د دهنو په کلي کې په هوايي بريد کې ووژل شول.
پاى \ف\ج\ ذ

کابل / باختر/ دکب دمياشتې٢٧مه نيټه :
د بغلان ولايت په پلخمري ښارکې درې تنه د يوه ماين د چاودنې له امله ټپيان شول.
دبغلان ولايت د امنيې قوماندانۍ وياند جاويد بشارت دباخترآژانس خبريال ته وويل چې  دغه ماين چې په يوه کرولا ډوله موټرکې ځاى پرځاى شوی و، د صرافيو په بازار کې چې يوه ګڼ مېشته ساحه ده، وچاوديد.
ده وويل: تر اوسه پورې د دغې پېښې په اړوند څوک نه دي نيول شوي او د دغې پېښې د عاملانو د نيولو لپاره د پوليسو هلې ځلې دوام لري.
پاى \ف\ ج\ ذ

کابل/ باختر/ د کب د مياشتې ٢٧مه
د آسیا د اتلوالۍ په مقدماتي سیالیو کې د افغانستان د ۲۳ کلنو ځوانانو د ټیم د لوبغاړو نوملړ مشخص شو.
د افغانستان د فوټبال فدراسیون د خپرونو مسوول شفع شاداب د باختر آژانس خبریال ته وویل چې د آسیا دغه مقدماتي سیالۍ د قطر په پایتخت دوحه کې د مارچ د میاشتې له ۲۲مې څخه تر ۲۶مې نېټې پورې ترسره کېږي.
ده زیاته کړه چې د افغانستان د ۲۳ کلنو ځوانانو د فوټبال ملي ټیم په دغو سیالیوکې د مارچ په ۲۲مه د قطر، د مارچ په ۲۴مه کې د عمان او د مارچ په ۲۶مه کې د نیپال د فوټبال له ملي ټیمونو سره لوبه کوي .
د افغانستان د فوټبال فدراسیون د معلوماتو له مخې، له دغو څلورو ټیمونو څخه به دوه ټیمونه وروستي پړاو ته لاره ومومي .
پای/سعیده

بغداد/ دامريکاغږ/ دکب دمياشتې ٢٧مه
د عراق حکومت او د ملګروملتونو یو هیات د شنبې په ورځ د موصل ایالت په شمال کې د سنجار په سیمې کې د یو ډلیزه قبر سپړل پیل کړي دي.  
د دی قبرسپړلو په وخت د قربانیانو ګڼ شمیر خپلوان هم غونډ شوي وو.
داسی ګومان کیږي چې په دې سیمې کې د یزیدي نارینه و، هلکانو او ښځو په ګډون،  په سلګونو خلک به په ډله ييز قبرونو کې خښ کړل شوي  وي.  
تراوسه په سنجاز ښار کې تر اویا  زیات ډله يیزه قبرونه موندل شوي دي . 
دا سیمه د ۲۰۱۵ په نوامبر کې د داعش له جنګیالیو ازاده شوه. 
ددی ډله يیزه وژنې یو ژوندې پاتې کس، ادریس بشر وایي په لومړنۍ ډله يیزه وژنې کې ژوندې پاتې شو او لومړنی ډله يیز قبر ایستل يي په خپلو سترګو ولید.     
د بشر په وینا کیدلی شي دوه درې کاله وخت ونیسي چې دا ټول قبرونه وسپړل                  او خلک يي وپیژندل شي. 
د ندا سیلو په نامه یوې بلې نجلۍ وویل د هغې ورورچې په کوچو کلي کې مدني فعال و، هغه هم ورک دی او هره ورځ په دې هیله یو که ژوندې وي.    
ندا وایي د دی قبرونو په لیدو دا هیلې مړې شوې، ځکه دا بدبختي د کلونو راهیسې روانه وه اوس په دې مایوسه شوو چې دا یوه ریښتې تراژیدي شوه.   
دا وژنه اکثره د ۲۰۱۴ کال د اګست په میاشت کې شوي چې کله داعش وسله والو د سنجار ښار ونیو. 
د نوبل د سولې جایزې ګټونکې نادیه مراد  د همدې کوچو د کلي ده او اوس يي د ډله يیزه قبرونو د سپړلو په کار کې سهم اخستې دى .     
د نادیې په وینا په د یزیدیانو داسی فامیل نشته چې د سخت دریځو د لاسه يي زیان نه وي لیدلی.   
پاى \ذکرالله

کويټه/ آزادۍ راډيو/ دکب دمياشتې ٢٧مه
د پاکستان پولیس وايي چې د بلوچستان ایالت په یوه رېل ګاډي کې د چاودنې  له امله  لږترلږه ۴ تنه و وژل شول او ٧ تنه نور ټپیان دي. 
دغه چاودنه د کوټې د جنوب ختیځ په ۳۰۰ کیلومترۍ په مراد جمالي ډېرۍ سیمه کې رامنځته شوې ده. 
یوه عیني شاهد نذیر احمد د پېښې په ځای کې خبریالانو ته وویل:  ناڅاپه یوه چاودنه وشوه او بیا د ډزو غږ شو، ورپسې د رېل ګاډي واګونونه له پټلۍ  څخه واوښتل  . 
د دغې سیمې د پولیسو قوماندان عرفان بشیر وايي، دغه رېل ګاډی له راولپنډۍ څخه کوټې ته روان و چې پر لاره د ریموټ کنټرول بم په وسیله چاودنه پکې وشوه او په نتیجه کې د رېل درې واګونونه له پټلۍ  څخه ووتل.   
د دغې چاودنې مسولیت کومې ډلې نه  دی منلی.  
پاى \ذکرالله

کابل / باختر/ د کب د میاشتې ۲۷ مه
په سرپل ولایت کې د وسله والو مخالفینو د تحرکاتو او یرغلیزو بریدونو د مخنیوي او شنډولو په خاطر د چټک غبرګون ۳۰۰ کسیزه قطعه جوړه شوه.
د سرپل والي عبدالقادر آشنا باختر آژانس ته وویل چې په دې قطعه کې په سپکو او درندو وسلو سمبال د ملي اردو څواکونو، ملي پولیسو او د ملي امنیت ځواکونه شامل دي او ځانګړو دندو ته سوق کېږي .
د سرپل والي زیاته کړه چې د دغې قطعې له جوړیدو څخه پنځه ورځې تیریږي او ښې پایلې ترلاسه کېږي.
د سرپل په ولایتي شورا کې د خلکو استازو د دغې قطعې د جوړولو هرکلی وکړ او هیله یې څرګنده کړه چې امنیتي ځواکونه له دفاعي حالته ووځي او یرغلیز حالت غوره کړي چې د دولت مخالفين د تحرکاتو وس پیدا نه کړي.
پای/ فرشته او مینه/ ع

 

کابل / باختر/ د کب د میاشتې ۲۷ مه
په بلخ ولایت کې پرون څو کلي د وسله والو طالبانو له شتون څخه پاک شول .
د ۲۰۹شاهین قول اردو ویاند جګړن محمد حنیف رضايي باختر اژانس ته وویل چې د پوځیانو د ګډو عملیاتو په بهیر کې چې د دغه ولایت په دولت اباد ولسوالۍ کې  ترسره شول، څو کلي د دښمن له شتون څخه پاک شول.
ده زیاته کړه: په دغوعملیاتوکې وسله والو طالبانو ته د سرزیان اوښتی دی او عملیات دوام لري.
پای/ج/ع

Page 1 of 7498