25 May 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

فرهنگی

 کابل / د غبرګولي ۴ مه / باختر
د نېکمرغه کوچني اختر په مناسبت د اطلاعاتو او فرهنګ وزارت د مشرتابه پیغام
د اطلاعاتو او فرهنګ وزارت رهبري د نېکمرغه کوچني اختر د رارسېدو په مناسبت د افغانستان او نړۍ ټولو مسلمانانو ته د زړه له تله مبارکي وایي. د خوښۍ ځای دی چې زموږ پر دین مین ولس په هېواد کې د جګړو له دوام، د کرونا ویروس له خپرېدو او نورو ګڼو ستونزو سره سره، د طاعتونو، عبادتونو او د نفس د تزکیې میاشت په خپل کلک ایمان او ټینګې اسلامی عقیدې سره پای ته ورسوله او له دغه ستر الهي آزمونه یو ځل بیا بریالی او سرلوړی راووت.
له بده مرغه د روژې په مبارکه میاشت کې د افغانستان د اتل وسله وال پوځ د اړوندوانو په ګډون زموږ یو شمېر هېوادال په ترهګریزو بریدونو کې په شهادت ورسېدل او د طبي پرسونل په ګډون یو شمېر نورو هم د کووېډ-۱۹ ناروغۍ له امله خپل ژوند له لاسه ورکړ. موږ د ټولو شهیدانو پا ک روح ته دعا کوو او له کورنیو سره یې خواخوږي او همدردي شریکوو. کوچنی اختر پر خپل عقیدتي ارزښت سربېره ستر ټولنیز ارزښت هم لري. اختر په حقیقت کې د ټولنیزې سولې او پخلاینې، زغم، صبر او دوه اړخیز درناوي جشن دی؛ خو له بده مرغه موږ سږکال کوچنی اختر په عادی شرایطو کې نه نمانځو. کرونا ویروس د خپرېدو په حال کې دی او زموږ د ټولو سلامتیا او ژوند ګواښي. له دې امله موږ باید د ځان، کورنۍ، خپلوانو، دوستانو، همکارانو او ټول ملت د روغتیا د ژغورلو په موخه د اختر په ورځو کې روغتیایي سپارښتنې او پیغامونه په کلکه رعایت کړو. موږ د کوچني اختر په ویاړ په جګړه کې ټول ښکیل لوري اوربند ته رابولو. لکه پورته چې وویل شول اختر د ټولنیزې سولې او پخلاینې جشن دی، له دې امله باید ښکیلې خواوې د اختر په درناوي له تاوتریخوالي او جګړو ډډه وکړي. موږ پر شتمنو هېوادوالو غږ کوو چې د روژې په څېر د اختر په ورځو کې هم له بې وزلو سره مرسته وکړي.
په پای کې یو ځل بیا د کوچني اختر په مناسبت تاسې ټولو ته د زړه له تله مبارکي وایو.
پای.ن.ش

 کابل/ د ثور٣١ مه / باختر
داطلاعاتو اوفرهنګ وزارت د مشرتابه هيئت  او کارکوونکو له خوا  نن دقران عظيم الشان ختم  وشو.
دباختراژانس دخبرله مخې ؛ د ختم په دغو مراسمو کې داطلاعاتو اوفرهنګ وزارت سرپرستې  حسينې ساپۍ  او ددغه وزارت مشرتابه هيئت او يوشمېر کارکوونکو دقران عظيم الشان له ختم وروسته  دوروستيو پېښو دشهيدانو روح ، دټپيانو دروغتيا  ، د جګړې او وينې تويدنې دبندلو ، دخلکو داتحاد او پيوستون او دغه راز په هېواد کې ددايمې سولې اوثبات دټينګښت دعا وشوه.
پاى \ج \ ذ            

-کابل/ دثور ٢٩/باختر :
درسانه يي شکايتونو اوسرغړونو دڅېړنې کمېسيون نن  داطلاعاتواوفرهنګ وزارت دسرپرستې حسينې ساپۍ په مشرۍ  غونډه وکړه .
دباختراژانس دخبرله مخې،  په دې غونډه کې  درسانه يي شکايتونو اوسرغړونو  دڅېړنې دکمېسيون  غړو دشپږو رسانه يي شکايتونو اوسرغړونو په اړوند خبرې وکړې .
داطلاعاتواوفرهنګ وزارت سرپرستې حسينې ساپۍ  وويل چې ټول رسانه يي  شکايتونه اوسرغړونې  په عادلانه ډول ددغه کمېسيون له  خوا څېړل کېږي .  او دکمېسيون دغړو دنظريو او پريکړې وروسته  شکايت کوونکو کسانو ته  ليکلې  ځواب  لېږل کېږي .
دکمېسيون غړو د رسانه يي شکايتونو اوسرغړونو په باب خپلې نظريې شريکې کړې  او کمېسيون ددغو شکايتونو اوسرغړونوپه باب پريکړه وکړه .
په پاى کې درسانه يي شکايتونواوسرغړونو دکمېسيون منشي وحيد الله معنى دتېر کال داجرااتو په باب دکمېسيون غړو ته رپوټ وړاندې کړل .
  ختم_ ج _اکرم

کابل / دثور ٢٧مه /باختر :
داطلاعاتواوفرهنګ وزارت  دفرهنګ اوهنر معين  نن دوسله والو جګړوپه بهير کې  دفرهنګي ميراثونو دملاتړ اوساتنې د ١٩٥٤ کنوانسيون  د اجرايي کېدو په مقصد  دبين الوزارتي کميټې غونډه  جوړه کړه .
دباختراژانس دخبرله مخې، په دې غونډه کې داطلاعاتواوفرهنګ وزارت دفرهنګ او هنر معين اوددغې کميټې رييس  پوهاند محمد رسول باوري وويل چې دلاحې د ١٩٥٤کنوانسيون  دبشري ميراثونو  دساتنې لپاره دى .
هغه زياته کړه   دغه کنوانسيون  له هغو سختوجګړو وروسته  چې له امله يې  تاريخي اثار او ابدات  ويجاړ شوي و ، دده سبب شو  چې يوشمېر هېوادونو دخپلو د تاريخي ابداتو او دفرهنګي ميراثونودساتنې په خاطر سره  يوځاى شي .
هغه څرګنده کړه چې افغانستان په  ٢٠١٨ ميلادي کال کې ددغه کمېسيون غړيتوب ترلاسه کړ .
دغه راز په دې غونډه کې  داطلاعاتواوفرهنګ وزارت  ستر حقوقي سلاکار دلاور نذير زوي دوسله والو جګړو په بهير کې دفرهنګي ميراثونودملاتړ اوساتنې د  ١٩٤٥کنوانسيون  داجرايي کېدو دبين الوزارتي کميټې  دطرز العمل  طرحه وړاندې کړه او ويې ويل : چې دغه طرز العمل  پنځه فصلونه او ٢٢ مادې لري .
په همدې ترتيب کې په دې غونډه کې دطرز العمل دطرحې او په دې کميټه کې دنويو غړو  دشاملولو په اړوند خبرې اترې وشوې .
ديادونې وړ ده چې دوسله والو جګړو په بهيرکې  دفرهنګي ميراثونو دملاتړاوساتنې  د ١٩٥٤کنوانسيون  داجرائيه کېدو بين الوزارتي کميټه  داطلاعاتواوفرهنګ وزارت دفرهنګ او هنر  دمعين  په مشرى  او دملي دفاع ، دکورنيو چارو او دبهرنيو چارو دوزارتونو  ، دملي امنيت دلوى رياست او دسره صليب  داستازو په غړيتوب فعاليت کوي .
  ختم _ج _ اکرم

Page 1 of 519