30 October 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

اقتصادی

 

کابل/ د لړم ۸مه/ باختر

د افغانستان د اسلامي جمهوریت د جمهوررئیس محمداشرف غني په حضور کې د هیواد په څلورو بین المللي هوايي ډګرونو کې د هیواد د هوایي ډګرونو د امنیتي خدمتونو، عملیاتي مدیریت،  ځمکني خدمتونو، سیستم جوړولو او ټکنالوژۍ تړونونه لاسلیک شول

په چهارچنار ماڼۍ کې په دې مناسبت جوړو شویو مراسموکې د ملي امنیت سلاکار، د مالیې وزارت سرپرست، د چارو ادارې لوی رئیس او یو شمېر نورو لوړپوړو دولتي مقاماتو هم حضور درلود، یاد قراردادونه د متحده عربي اماراتو د G42 شرکت رئیس منصور المنصوري او د ملکي هوایي چلند ادارې د رئیس ډاکټر محمد قاسم وفایي زاده له لوري لاسلیک شول.

د یادو مراسمو په پیل کې د پانګونې اسانتیا واحد رئیس عطاالله نصیب وویل، جمهوررئیس غني متحده عربي اماراتو ته د خپل سفر پر مهال لارښوونه وکړه چې د متحده عربي اماراتو د ملي هوايي چلند برخو  سره د همکارۍ پروسه پیل او له تجربو یې استفاده وکړو.

هغه زیاته کړه، د متحده عربي اماراتو د G42 شرکت له افغانستان سره د هوايي چلند په برخه کې د همکارۍ په خاطر خپله لېوالتیا او ژمنه څرګنده کړه او دغه شرکت د هوایي چلند، انرژۍ، روغتیایي خدمتونو، تېلو، ګاز او استخراجي صنایعو په برخه کې زیاتې تجربې لري.

عطاالله نصیب وویل، یاد درې قراردادونو د افغانستان په څلورو بین المللي هوايي ډګرونو حامد کرزي، مولانا جلال الدین بلخي ،احمدشاه بابا او هرات بین المللي هوايي ډګرونو کې د هوایي ډګرونو د ټکنالوژۍ او سیستم جوړولو او ځمکني خدمتونه، عملیاتي مدیرت او امنیتي خدمتونه، شامل دي.

وروسته د متحده عربي اماراتو د G42(GAAC)  شرکت رئیس منصور المنصوري وویل، د ویاړ ځای دی چې افغانستان ته راغلی یم او د جمهوررئیس غني په حضور کې مو د متحده عربي اماراتو د G42 شرکت او د افغانستان د ملکي هوايي چلند ادارې تر منځ د همکاریو تړونونه لاسلیک کړل.

هغه د هوایي چلند خدمتونو وړاندې کولو او مدیریت په برخه کې د G42 شرکت د تجربو په اړه معلومات وړاندې او زیاته یې کړه، د دغو تړونونو لاسلیکول د متحده عربي اماراتو او افغانستان ادارو د لازیاتې همکارۍ د فرصتونو پیل دی.

منصوري وویل، افغانستان او متحده عربي امارات دوستانه او تاریخي اړیکې لري او دغه مناسبات په وروستیو کلونو کې لا زیات پیاوړي شوي دي.

ورپسې جمهوررئیس غني په خپلو خبرو کې وویل، نن سهار موږ د نبي کریم (ص) نېکمرغه میلاد ونمانځه او په مازدیګر مو متحده عربي اماراتو سره د ستراتېژیکې همکارۍ تړون د  متحده عربي اماراتو کمپنۍ سره لاسلیک کړ.

جمهوررئیس زیاته کړه، دغه قراردادونه واقعا ستراتېژیک دي. د افغانستان او متحده عربي اماراتو ترمنځ سیاسي او تاریخې نېکې اړیکې د اقتصادي همکاریو بشپړ مشارکت نومولی شو.

جمهوررئیس وویل، افغانستان په خپلو هوایي ډګرونو کې سترې پانګې لري، خو متاسفانه دغه ظرفیتونه نه دي پېژندل شوي. موږ له اماراتو سره دغه همکاري په دې موخه ایجاد کړې چې تاسې د هوایي ډګرونو د ټکنالوژۍ او سیستم جوړولو او ځمکني خدمتونو او امنیتي خدمتونو په برخه کې غوره تجربې لرئ.

د هیواد جمهوررئیس څرګنده کړه: زه باور لرم چې زموږ د هوايي ډګرونو مسوولین او پرسونل، پېرېدونکي او خلک به متفاوت تغییرات احساس کړي.

جمهوررئیس وویل، موږ خپلو هوايي ډګرونو ته د مهمو زېربناو په توګه ګورو او په خپلو هوايي ډګرونو کې معیاري خدمتونو او هغو معیارونو ته چې د عملیاتي مدیریت او ځمکني خدمتونو له اړخه مهم دي، اړتیا لرو او د هوایي دهلېزونو له لارې د افغانستان د محصولاتو لېږد باید د همدغو معیارونو پر بنسټ ترسره شي.

جمهوررئیس د خپلو خبرو په پای کې وویل، موږ هوايي ډګرونو ته د مهمو زېربناوو په توګه ګورو. د حامد کرزي بین المللي هوايي ډګر زیات ظرفیت لري چې د کارګو او مساپرو په بستر بدلېدای شي او د احمدشاه بابا او هرات بین المللي هوايي ډګرونه اماراتو ته لنډ واټن لري او د مولانا جلال الدین بلخي بین المللي هوايي ډګر کولای شي د مرکزي اسیا لپاره د وصل پر نقطه بدل شي، له یوه بل سره شبکه جوړوي چې له دې شبکې څخه په استفادې کولای شي لا زیات خدمتونه وړاندې کړي.







 

- کابل / د لړم ٨مه /باختر
د هرات – خواف لومړنى مسافر وړونکى اورګاډى له ايران څخه افغانستان ته راورسېد.
د اوسپنى دغه پټلۍ چې د جوړولو کار يې  نوى  پاى ته رسيدلى دى ټاکل شوې ده ډېر ژر  د افغانستان او ايران د مقاماتوله خوا  پرانستل شي.
د دغې اوسپنې پټلۍ  لومړى اورګادى ايراني هيئت هرات ته ولېږداوه  چې د دغې اوسپنې پټلى وروستي کارونه وڅېړي او ګټې اخستنې ته يې وسپاري.
د هرات د والي وياند جيلاني فرهاد باختراژانس ته وويل  چې د اوسپني د دغې پټلۍ له پرانستلو وروسته  د ايرن او افغانستان ترمنځ د مسافرو اوتجارتي مالونود لېږدونې بهير له دې لارې  پيلېږي.
اقتصادي کارپوهان د ايران اوافغانستان ترمنځ د تجارتي مالونود لېږدونې لپاره  د اوسپنۍ د پټلۍ شتون د دواړو هېوادونوترمنځ د اقتصادي اوتجارتي دوامدارې ودې لپاره اغيزمن بولي  .
دوى وايي د دغې اوسپنى پټلۍ په پرانستلو سره  افغان سوداګراوصنعت کاران کولاى شي له دې لارې خپل تجارتي مالونه په تيټه بيه د ايران بازارونواو له هغه ځايه د نورو هېوادونو بازارونو ته ورسوي .
د هرات د والي وياند و ويل چې د دغې اوسپنۍ پټلى په پرانستلو سره  د دواړو هېوادونو د مسافرو او تجارتي مالونو د لېږدونې لپاره  د دواړو هېوادونو اړيکې  نوى پړاوته رسېږي چې افغانستان ته ځانګړي اقتصادي سمسورتيا زيرې ورکوي .
د هرات –خواف د اوسپنۍ پټلۍ د ايران په مرسته جوړه شوې ده .او هدف يې  د دواړو هېوادونوترمنځ د تجارتي اړيکو پراختيا ده
د افغانستان د اوسپنۍ پټلى د ادارې يو مسوول  وايي چې  د هرات –خواف د اوسپنۍ پټلى د جوړولوکار بشپړ شوى دى  او ډېرژربه  ګټې اخستنې ته وسپارل شي .
د هرات – خواف  د اوسپنۍ پټلى د جوړولوکار د١٩٣ کيلومترو په اوږډوالي په څلورو پړاونوکې  ١٣ کاله مخکې  پيل شو.
ختم_ ج (_اکرم

کابل / دلړم ٨مه /باختر
د افغانستان د اسلامي جمهوریت د جمهورريیس محمد اشرف غني په مشرۍ د ملي تدارکاتو کمېسیون غونډه پرون ماښام په ارګ کې جوړه شوه.
د جمهوررييس د وياند دفترباخترآژانس ته خبرورکړ.
په پیل کې د ملي تدارکاتو ادارې لوی ريیس الهام عمر هوتکي غونډې ته، اطلاعاتو ته د لاسرسي قانون د احکامو د تطبیق او اطلاع رسولو په چارو کې د غوره ادارې په توګه د ملي تدارکاتو ادارې ، په عامه قراردادونو کې د ذینفع مالکیت نافذولو لپاره د متحدالمال راټولولو او نشرولو او له صنعت او سوداګرۍ وزارت سره د ګډو همکاریو د هوکړه لیک د تړون په اړه معلومات وړاندې کړل.
نوموړي همدا راز د لوی څارنوالۍ له لوري د ملي تدارکاتو ادارې د اقداماتو د ستایلو او امنیتي سکتور د تدارکاتو اصلاحي طرحې په اړه د ملي تدارکاتو کمېسیون د پرېکړې تحقق د پرمختګ څرنګوالی غونډې ته وړاندې کړ چې د کمېسیون ريیس او غړو یې هرکلی وکړ.
وروسته غونډې د اجنډا مطابق د زېربنایي، اعاشوي او خدماتي پروژو او د امنیتي خدمتونو په اړه د لارښوونې غوښتنه، د هوایي ډګر دننه د ځمکني لېږد رالېږد خدمتونو (Ground Handling) او د ملکي هوایي چلند ادارې اړوند د هیواد په بین المللي هوایي ډګرونو کې د ټکنالوژۍ او خدمتونو د لېږد سیستم په ګډون، ۱۰۶ تدارکاتي موارد له بحث او ارزونو وروسته منظور کړل.
په همدې ترتیب، ملي تدارکاتو کمېسیون د ۴۷ مواردو په اړه د لارښوونو غوښتنو، یادښتونو، وړاندیزونو او تدراکاتي موضوعاتو په اړه هم لازم تصمیمونه ونیول او په هکله یې اړوندو ادارو ته لازمې لارښوونې وکړې.
سربېره پر دې د بنسټونو د پروژو د درخواست د منظورۍ ۱۶ غوښتنې ملي تدارکاتو کمېسیون وارزولې او په اړه یې تصمیمونه ونیول شول.
په غونډه کې ټینګار وشو له خصوصي سکتور او متشبثینو څخه د دولت خریداري د پانګونې د پیاوړتیا لامل ګرځي، بنا بنسټونه مکلف دي چې تل د داخلي تولیداتو او خصوصي سکتور ملاتړ وکړي.
همدا راز د اجنډا مطابق په دغه غونډه کې د کمېسیون غړو د کمېسیون د مخکېنیو پرېکړو د لارښوونو د تحقق پر ۱۹ راپورونو هم بحث وکړ.#
پاي-ج

کابل / دلړم ٨مه /باختر
د صنعت اوسوداګرۍ وزارت سرپرست نثار احمد غورياني چې د خصوصي او دولتي برخې د يو لوړ رتبه هيئت په مشرۍ  د پاکستان اسلامي جمهوريت ته سفر کړى دى نن يې  د دغه هېواد د سنا مجلس له رييس  محمد صادق سنجراني سره وکتل.
  د باختراژانس د خبرله مخې ؛  په دې کتنه کې په داسې حال کې چې د افغانستان پارلمان د روغتيا، ورزش او د ځوانانو چارو د کمېټې رييس نجيب الله ناصر هم حاضرو د افغانستان او پاکستان ترمنځ  د تجارتي او ترانزيتي همکاريو د پراختيا او دغه راز د دواړو هېوادونوترمنځ د تجارتي حالت په ښه والي، د سولې د اغيزې په باب خبرې اترې وشوې.
دغه راز د هېواد د صنعت او سوداګرۍ د وزارت سرپرست د افغانستان او پاکستان  ترمنځ د سوداګرۍ او ترانزيت  د پراختيا او ښه والي په لاره کې  د افغانستان سوداګرو د ستونزو د لرې کولو په خاطر د پاکستان دولت د زياتو همکاريو غوښتنه وکړه .
د پاکستان د سنا مجلس رييس محمد صادق سنجراني هم په تېرو کلونوکې د افغانستان او پاکستان  د دوستانه اړيکو يادونه وکړه اوټينګار يې وکړ چې د دواړو هېوادونوترمنځ د تجارتي اړيکو نوې فصل پيل شوى دى.
د هېواد د صنعت او سوداګرۍ د وزارت سرپرست چې د پاکستان – افغانستان  ٢٠٢٠سوداګرۍ او پانګې اچونې په غونډه کې د ګډون په مقصد اسلام اباد ته  سفر کړى دى دغه راز  د پاکستان د دولت له يوشمېر لوړ پورو مقاماتو سره هم ليده کاته او خبرې اترې وکړې.
ختم_ ج _اکرم

Page 1 of 1096