08 April 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

جمهورريیس غني د نیالګیو کرلو په اړه نهه ماده یيز حکم صادر کړ

Written by  manager
Rate this item
(0 votes)

کابل/ د کب٨ مه/ باختر
د افغانستان د اسلامي جمهوريت جمهورريیس محمد اشرف غني د اساسي قانون د پنځلسمې مادې په رعایتولو سره د شنو ساحو د پراختیا، د ژوند چاپېریال د ښه والي او د هواککړتیا کموالي کې د ونو او ځنګلونو ارزښت ته په کتو د نیالګیو د کرلو په  موخه نهه ماده یيز حکم صادر کړ.
د جمهوررييس د وياند دفتر باختر آژانس ته خبر ورکړ؛ د دغه حکم د لومړۍ مادې پر بنسټ د کب ٢٠مه په هېواد کې د نیالګیو کرلو د ملي ورځې په توګه نمانځل کېږي.
د حکم د دویمې مادې د لومړي بند په اساس په مرکز او ولایتونو کې د وزارتونو او ادارو مسوولین موظف دي چې د چاپېریال ساتنې ملي ادارې او اړوندې ښاروالۍ سره په همغږۍ هرکال د کب په ٢٠مه د نیالګي په کرلو سره په رسمي توګه د نیالګیو کرلو کمپاین پیل کړي.
د همدغې مادې د دویم بند په اساس په مرکز او ولایتونو کې د وزارتونو او ادارو مسوولین موظف دي چې د چاپېریال ساتنې له ملي ادارې سره په همغږۍ په کب او وري میاشتو کې د ولایتونو اقلیمي شرایطو ته په کتو د نیالګیو کرلو برنامه تنظیم کړي. 
د نیالګیو کرلو په اړه د جمهورريیس د حکم د درېیمې مادې د لومړي بند له مخې؛ په مرکز او ولایتونو کې وزارتونه، دولتي ادارې، ملکي او نظامي تعلیمي او تحصیلي موسسې مکلفې دي چې د خپلو کارکوونکو، د ثانوي دورې زده کوونکو او محصلینو نوملړ د نیالګیو د وېش په موخه په رسمي توګه کرنې او مالدارۍ وزارت ته واستوي.
د درېیمې مادې د دویم بند په اساس کرنې او مالدارۍ وزارت موظف دی چې د دولت کارکوونکو، د ثانوي دورې زده کوونکو او د لوړو او نیمه لوړو زده کړو موسسو محصلینو ته د نیالګیو کرلو په موسم کې د اړتیا وړ نیالګي برابر کړي او همدارنګه درېیم بند کرنې او مالدارۍ وزارت په دې مکلف کړي دي چې په مرکز او ولایتونو کې د نیالګیو د وېش بهیر د چټکولو لپاره طرزالعمل ترتیب کړي.
په همدې ترتیب د جمهورريیس د حکم د څلورمې مادې د لومړي بند په اساس د نیالګیو کرلو ملي برنامې د همغږۍ او انسجام، د طرحو د تدوین، د پلانونو د تطبیق او عامه پوهاوي په موخه د چاپېریال ساتنې ملي ادارې د ريیس په مشرۍ د کرنې او مالدارۍ وزارت د معین، د ښار جوړولو او ځمکو وزارت د معین، د کلیو پراختیا وزارت د معین، د سیمه ییزو ارګانونو د خپلواکې ادارې د معین او اړوند ښاروال په غړیتوب د همغږۍ کمېټه جوړېږي.
د دویم بند په اساس د همغږۍ کمېټه کولای شي د اړتیا له مخې د نورو وزارتونو او دولتي ادارو، خصوصي سکتور او مدني ټولنې باصلاحیته استازي خپلو غونډو ته ور وغواړي.
د جمهورريیس د حکم د پنځمې مادې د لومړي بند له مخې؛ د کرنې او مالدارۍ وزارت او اړوندې ښاروالۍ د همغږۍ له کمېټې سره په همکارۍ موظف دي چې ساحې وټاکي، خاوره وپېژني او د نیالګیو ډول تثبیت کړي.
دویم بند د همغږۍ کمېټه په دې مکلفوي چې په هېواد کې د نیالګیو کرلو نوي روشونه، د ځنګل ابادولو او د نیالګیو کرلو پروسه کې له ټکنالوژي څخه ګټه اخیستنه معرفي او ترویج کړي. 
د یاد حکم د شپږمې مادې لومړی بند حکم کوي چې د ملکي او نظامي ادارو هر دولتي کارکوونکی، د ثانوي دورې زده کوونکي او د لوړو زده کړو او نیمه لوړو زده کړو موسسو محصلین مکلف دي چې د نیالګیو کرلو موسم کې یو نیالګی د همغږۍ کمېټې له لوري مشخص شوي ځای کې وکري.
د همدغې مادې دویم او درېیم بندونه د همغږۍ کمېټه مکلفوي چې د شرکتونو، صنعتي او سوداګریزو تاسیساتو خاوندان د نیالګیو کرلو برنامې تمویل او د نیالګيو کرلو ته وهڅوي  او همدارنګه مدني ټولنه د نیالګیو کرلو ملي برنامه کې د شاملولو ترڅنګ د نیالګیو کرلو اوځنګل ابادولو نويو روشونو او د هغو ساتنې ته وهڅوي. 
د نیالګیو کرلو په اړه د محمد اشرف غني د حکم د اوومې مادې لومړی بند او دویم بند په مرکز او ولایتونو کې وزارتونه او دولتي ادارې په خپلو اړوندو ملکیتونوکې او اړوندې ښارۍ په عامه ښاري ځایونوکې د نیالګیو په ساتنه، مراقبت او اوبه کولو موظفوي.
د حکم د اتمې مادې په اساس؛ د همغږۍ کمېټه د دې حکم د تطبیق په څارنه موظفه ده چې د مالي کال د دویمې ربعې پای کې به د عالي مقام د چارو ادارې ریاست له لارې خپل راپور د افغانستان اسلامي جمهوریت عالي مقام ته وړاندې کوي.#
پاى / ذ

Leave a comment

Make sure you enter the (*) required information where indicated.
Basic HTML code is allowed.