خبرونهاقتصادTOP

جمهورريیس: رحیمګردېزي ګروپ ته د فابریکې مبارکي وایم او مډال به هم ورکړم

٥٥- کابل / دمرغومي ١٦/باختر
د افغانستان داسلامي جمهوریت جمهورريیس محمداشرف غني نن له غرمې مخکې د رحیم ګردېزي د ځڼغوزیو د پروسس فابریکې د پرانیستې په مناسبت جوړه شوې غونډه کې ګډون او وینا وکړه.
د جمهوررييس د وياند دفترباخترآژانس ته خبرورکړ.
په چهار چنارماڼۍ کې په دې مناسبت جوړې شوې غونډې ته چې د پکتیا مرکز ګردېز څخه د پکتیا، پکتیکا، خوست او لوګر واليان او یو شمېر نور مشران د ویډیو کنفرانس له لارې وصل وو، د پانګونې د اسانتیا واحد ريیس عطاالله نصیب وویل، د جمهورريیس غني په وینا زموږ پټې خزانې نورې ښکاره، مشروع، رڼې او د استفادې وړ دي او د ځڼغوزیو د قاچاق مخنیوي، تولید پروسس، بسته بندۍ او خرڅلاو کې پام وړ پرمختګ راغلی.
نوموړي له رحیم ګردېزي ګروپ څخه د دغې مهمې پانګونې مننه وکړه او وې ویل، افغانستان د کال ۲۴ زره ټنه د ځڼغوزیو حاصلات لري چې د حکومت په پاملرنه هر کال لس، دولس سلنه زیات او زرګونه خلکو ته کاري زمینې برابرېږي. له نورو پانګوالو څخه هم د پانګونې هیله کوو او ډاډ ورکوو چې ټولې لازمې اسانتیاوې به ورته برابرې کړو.
د کرنې، اوبو لګولو او مالدارۍ وزیر جمهورريیس ته د رحیم ګردېزي د ځڼغوزیو د پروسس فابریکې د مبارکۍ پرمهال وویل، دا ستاسو په نوښت او هڅونه جوړه شوه چې د ځڼغوزیو تولید او عاید به ورسره زیات او د ارزښت زنځیرپیاوړی شي. هغه زیاته کړه، رحیم ګردېزي شرکت د پولادو په برخه کې ښه نوم لري او هیله ده چې د ځڼغوزیو په برخه کې هم ښه وځلېږي.
ډاکټر انورالحق احدي څرګنده کړه، دغه ډول کرنیزې صنایع د هیواد په صنعتي کېدو کې خپل ارزښت لري. افغانستان د ځڼغوزیو تولیدونکی او صادرونکی هیواد دی او د ځڼغوزیو په ګډون د بېلابېلو ځنګلونو احیا سره به ګڼو خلکو ته کاري زمینې برابرې او ملي عواید لوړ شي. هغه زیاته کړه، د کرنیزو صنایعو د ودې په موخه په دې سکتور کې د پانګونې لپاره پانګوالو ته د هراړخیز ملاتړ او اسانتیاوو ډاډ ورکوو.
د سوداګرۍ او پانګونې خونې د مدیره پلاوي لومړي مرستیال محمدیونس مومندجمهورريیس څخه په مننې وویل، غواړو ستاسو په پاملرنه د افغانستان ټول کرنیز پیداوار د ځڼغوزیو غوندې د تولید، پروسس او بازارموندنې له پلوه وده وکړي. کوم پانګوال چې پانګونه او نوښتونه کوي د هڅونې په موخه دې ورته مډال ورکړل شي چې د کاروبار له لارې عواید لوړ او هیواد په پښو ودرېږي.
ورپسې د رحیم ګردېزي د ځڼغوزیو د پروسس فابریکې ريیس محبوب الله ګردېزي وویل، په پکتیا کې د دغې لویې او معیاري فابریکې په جوړولو او پرانیستلو چې ټولو ته د ښه راتلونکي هیله ورکوي خوښ دی او جمهورريیس ته یې د هغه د پرانیستې مبارکي وویله.
هغه زیاته کړه، که اسانتیاوې ورته برابرې شي، نو د برېښنا په برخه کې به هم پانګونه وکړي، ځکه له دې سره کاري زمینې زیاتې او بې وزلي کمېږي. له پانګوالو یې وغوښتل چې په بېلابېلو برخو کې د پانګونو له لارې شغلونه ایجاد کړي.
د جمهورريیس په لارښوونه د پکتیا، پکتیکا، خوست او لوګر والیانو له لوري په ګردېز کې د پټۍ په پرې کولو سره د رحیم ګردېزي د ځڼغوزیو د پروسس فابریکې له پرانیستې وروسته جمهورريیس غني دغو مراسمو ته په وینا کې وویل، نن ویاړمنه ورځ ده چې د افغانستان د ثروت د ارزښت زنځیر یانې د ځڼغوزیو د پروسس برخه کې له کیفي او کمي پلوه بدلون راځي.
جمهورريیس وویل، ټولو هیوادوالو او په ځانګړي ډول رحیم ګردېزي ګروپ ته د دغې پانګونې مبارکي وایم او د قدرونې په موخه به ورته مډال ورکړم. د هر ولایت پانګوال دې په خپلو ولایتونو کې دغسې پانګونې وکړي، ځکه دا د هیواد ثبات، یووالي او اقتصادي وده کې پام وړ اغېز لري.
جمهورريیس وویل، د ځڼغوزیو د پروسس د دغې فابریکې پرانیستې سره ګردېز نه یوازې له تاریخي بلکې اقتصادي پلوه هم خپل ارزښت ځلوي او ټولو ته یې مبارکي وایم. همدارنګه یې د ځنګلونو د ساتنې په برخه کې د پکتیا، پکتیکا او خوست د ولسونو د اقداماتومننه وکړه.
د هیواد جمهورريیس د ځنګلونو د زرغونولو او ساتنې په برخه کې د ولسونو رول ته په اشارې وویل، ټولو ولسونو ته مې پیغام دی چې د ځنګلونو زرغونتیا د دوی د ګټې لپاره ده او دې برخې ته به اساسي پاملرنه او پانګونه پرې وشي.
جمهورريیس غني د کرنې، اوبولګولو او مالدارۍ، صنعت او سوداګرۍ وزارتونو او د پانګونې د اسانتیا واحد ته لارښوونه وکړه، چې د ځڼغوزیو په ګډون د بېلابېلو ځنګلونو د زرغونولو، د کرنیزو محصولاتو او مېوو د ودې، پروسس، بسته بندۍ او نورو برخو کې د پانګونو او نورو همکاریو د جلبولو په موخه له پانګوالو او خصوصي سکتور سره همغږي او همکاري وکړي.
جمهورريیس وویل، افغانستان دا مهال له ۵۲ څخه زیاتو هیوادونو سره د هوایي دهلېزونو له لارې وصل دی، مګر ځمکني دهلېزونه هم ضرور دي او باید فعال شي. پانګوال دې د ځڼغوزیو په څېر د کرومایت په برخه کې هم اساسي پانګونه وکړي.
جمهوررئیس غني په ټینګار سره وویل، زموږ پانګوال د هیواد د اقتصاد د ملاتیر دي اود بازار منطق درک کوي، له ټولو نړیوالو مناسباتو څخه به دوی ته د لازمو اسانتیاوو برابرولو لپاره استفاده وشي. هغه زیاته کړه، پانګوالو ته د لازمو اسانتیاوو برابرولوکې ځنډ او خنډونه د منلو وړ نه دي .
محمداشرف غني د خپلې وینا په پای کې وویل، په یو کال کې به یو میلیون هکتاره ځمکه خړوب او افغانستان باید د کرنیز پیداوار او صادراتو په مرکز بدل او د ارزښت زنځیر پیاوړی شي. هغه زیاته کړه له دې وروسته به هر سفیر په اړوندو هیوادونو کې د افغانستان دتاجرانو او پانګوالو استازی او هغوی ته د بازارموندنې او نورو برخو کې د اسانتیاوو برابرونکی وي.#
پاى- ج

نمایش بیشتر

نوشته های مشابه

دکمه بازگشت به بالا